Os guerreiros de terracota (兵馬俑; pinyin: bīng mă yŏng, tradución literal: "Figuras de soldados e cabalos") son unha colección de esculturas feitas en terracota que representan aos exércitos de Qin Shihuang , o primeiro emperador da China. É unha forma de arte funeraria enterrada co emperador en 210–209 a. C. co propósito de protexer ao emperador na súa vida futura.

Os guerreiros de terracota atópanse dentro do Mausoleo de Qin Shi Huang, tamén coñecido como o Mausoleo do Primeiro Emperador Qin (秦始皇陵; pinyin: qín shĭ huáng líng), foi descuberto en marzo de 1974 durante unhas obras para o abastecemento de augas de regadío preto de Xi'an, China. Desde o ano 1987 está considerado por parte da UNESCO como Patrimonio da Humanidade.