Eskuen leizea (gaztelaniaz: Cueva de las Manos) Argentinako leizea edo leize multzoa da, Santa Cruzko probintzian dagoena, Perito Moreno herritik 163 kilometro hegoaldera. Ezaguna da, izenak adierazi bezala, paretean margotuak dauden eskuengatik. Leizeko artelan horiek orain dela 13.000 eta 9.000 urte egin ziren. Talde desberdinek okupatu zuten leizea denboran zehar, eta lanik goiztiarrenak K. a. 7.300. urtean datatu ahal izan dira karbono-14 bidez.