A Fonte máxica de Montjuïc (en catalán: Font màgica de Montjuïc), ou sinxelamente chamada Fonte de Montjuïc, atópase na praza de Carles Buïgas, no distrito de Sants-Montjuïc, Barcelona.

É o elemento principal dun conxunto de xogos de luz e auga que se desenvolve en todo o eixo dende o Palau Nacional até a Plaça d'Espanya, que inclúe fervenzas e estanques e, na parte inferior, ringleiras de columnas luminosas a ámbolos lados da avenida, hoxe en día substituídas por surtidores iluminados de proporcións semellantes e de mantemento máis doado.