Castelo de Óbidos
( Օբիդուշի պալատ )Օբիդուշի պալատ (պորտ.՝ Castelo de Óbidos), միջնադարյան պատմաճարտարապետական հուշարձան։ Գտնվում է Պորտուգալիայի Լեյրիյա շրջանի Օբիդուշ քաղաքում (Էշտրեմադուրա պատմական շրջան)։ 2007 թվականին մշակույթի նախարարության կողմից ընդգրկվել է Պորտուգալիայի յոթ հրաշալիքների ցանկում։
Ժամանակակից ամրոցի շինարարությունը սկսվել է 12-րդ դարում։ Պաշտպանական ոճով կառուցված դղյակն ունի քառանկյան տեսք` 30 մ երկարությամբ կողմերով։
Պալատը կառուցվել է հինհռոմեական ամրության տեղում[1]։ Մոտակայքում գտնվում է Կալդաշ դա Ռաինյա խոշոր քաղաքը (պորտ.՝ Caldas da Rainha):
5-րդ դարում Պիրենեյան թերակղզի են ներխուժել վեստգոթերը։ Օգտագործելով հռոմեական ամրությունը` նրանք կառուցել են ամրոց, իսկ որպես շինանյութ օգտագործել են Օբիդուշից 1 կմ հեռավորության վրա գտնվող հինհռոմեական պատմական Eburobrittium քաղաքի քարերը։
711-718 թվականների իսլամական նվաճումների ժամանակ ամրոցն անցել է արաբներին։ Կորդովայի ամիրայության ձևավորման ժամանակ արաբները Օբիդուշի ամրոցը դարձրել են պատմական Էշտրեմադուրա շրջանի կարևոր կետերից մեկը. այն մտել է նահանգի ստորին հատվածի մեջ։ Գնահատելով տեղի ջրի որակը` արաբները հռոմեական թերմերի տեղում վերականգնել են բաղնիքները։ Արաբներն ավարտին են հասցրել գյուղի շրջակայքում ամրոցային պատերի շինարարությունը։
1227 թվականին արաբական Բադախոս էմիրությունը մտնում է Պորտուգալիայի կազմի մեջ։ Պորտուգալացիներն ընդարձակում են ամրոցը` կառուցելով մի քանի շարք պաշտպանական պատեր։ Ամրոցն իր ժամանակակից տեսքը ձեռք է բերել 15-րդ դարում։ Պալատում սկսում են իշխել արքային ենթակվող տարբեր ֆեոդալներ։ Պալատը դառնում է պորտուգալացի իշխողների սիրելի նստավայրը հատկապես նոր ժամանակների սկզբնական հատվածում։ Միապետներն այստեղ կազմակերպում են տոնական ընդունելություններ, հարսանիքներ, տոնահանդեսներ, քանի որ Օբիդուշը գտնվում էր Լիսաբոնից ոչ հեռու։
18-րդ դարում Պորտուգալիայում տնտեսական անկում է սկսվում, և ամրոցը դատարկվում է` մասամբ վնասվելով։ Դրան նպաստում է Լիսաբոնի երկրաշարժը, որն ավերում է ամրոցի կենտրոնում գտնվող պալատը։ Սկսած 19-րդ դարից` ամրոցը դառնում է զբոսաշրջային գրավիչ ուղղություն։
↑ Mendonça, Isabel; Matias, Cecília; Elias, Margarida (2011), SIPA, ed., Castelo de Óbidos/Castelo e cerca urbana de Óbidos/Pousada de Óbidos (IPA.00003324/PT031012040001) (in Portuguese), Lisbon, Portugal: SIPA – Sistema de Informação para o Património Arquitectónico, archived from the original on 9 March 2016, retrieved 31 July 2016
Ավելացնել նոր մեկնաբանություն