Շահի Զինդա (պարսկերեն՝ شاه زنده - բառացիորեն «կենդանի արքա», պարսկերեն հնչում է - Շոխ-ի Զինդա), միջինասիական միջնադարյան ճարտարապետական հուշարձան Սամարղանդ քաղաքում։ Կազմավորվել է 11-րդ-12-րդ դարերում, Աֆրասիաբ քաղաքատեղիի արևելքում (պեղումներից բացվել են դամբարանների, փայտե պորտիկի և մինարեթի մնացորդներ)։ Ներկա համալիրի (հիմնականում՝ 14-15-րդ դարեր) կազմում են նեղ փողոցի երկայնքով տեղադրված բազմագույն ջնարակած փորագիր թրծակավով, խեցե նկարազարդ երեսպատումով, հավաքովի խճանկարներով ճոխ հարդարված մեմորիալ-պաշտամունքային կառույցները.

• Կուսամ իբն Աբբասի (1334 թ.) դամբարանը,
• Շադի Մուլկ (1372 թ., ճարտարապետներ՝ Շամսեդդին, Բարեդդին, Զայնուդդին, Բուխարի) դամբարանը,
• Շիրին բեկ ակի (1385 թ.) դամբարանը,
• Թուման ակի համալիրը (15-րդ դարի սկիզբ)
• Կազի զադե Ռումի դամբարանը (15-րդ դ.)
• մզկիթներ (15-րդ դար)։