Սուրբ Գալլի վանքի գրադարան (գերմ.՝ Stiftsbibliothek St. Gallen), ամենահին գրադարանը Շվեյցարիայում։ Հիմնադրվել է Սուրբ Գալլի վանքի առաջին աբբայի՝ Սուրբ Օտմարի կողմից 8-րդ դարի սկզբում։ Սանկտ Գալլենյան վանքի գրադարանը համարվում է Եվրոպայի հնագույն գրքերի և ձեռագրերի ամենանշանավոր պահոցներից մեկը։

Գրադարանը պարունակում է 2100 ձեռագիր, որոնք թվագրվում են 8-15-րդ դարերին, (օրինակ՝ «Նիբելունգների երգը» ձեռագիրը) և 1650 ինկունաբուլներ։ Գրադարանի ֆոնդերում պահվում է մոտ 160 հազար օրինակ գիրք։ Գրադարանը բաց է հանրային այցերի համար։ Մինչև 1900 թվականը հրատարակված գրքերը սպասարկվում են հատուկ ընթերցասրահում։ Գրադարանի գլխավոր սրահը կառուցված է ռոկոկո ոճով։

1983 թվականին գրադարանը Սուրբ Գալլի վանքի հետ միասին ընգրկվել է ՅՈՒՆԵՍԿՕ-ի համաշխարհային ժառանգության ցանկի մեջ։ 20-րդ դարում գրադարանի առավել արժեքավոր երաժշտական ձեռագրերը տպագրվել են ֆաքսիմիլային եղանակով (հատկապես Paléographie musicale սերիայում)։

1990-ական թվականներին բացվել է վիրտուալ գրադարան, որտեղ թվայնացվել են կարևորագույն ձեռագրերը։