ប្រទេសក្រិក (ភាសាក្រិក៖ Eλλάδα) ដោយមានឈ្មោះជាផ្លូវការថា សាធារណរដ្ឋអេលេនិក (Ελληνική Δημοκρατία) គឺជាប្រទេសមួយស្ថិតនៅតំបន់អឺរ៉ុបអាគ្នេយ៍។ វាមានប្រជាជនសរុប ១០.៧ លាននាក់គិតត្រឹមឆ្នាំ២០២១ ហើយមានរដ្ឋធានីនិងទីក្រុងធំបំផុតឈ្មោះអាតែន។ ដោយមានទីតាំងភូមិសាស្ត្រ​នៅ​ចុង​ភាគខាង​ត្បូង​នៃ​តំបន់បាល់កង់ ប្រទេស​ក្រិក​គឺស្ថិត​នៅចំណុច​ផ្លូវ​បំបែក​នៃ​ទ្វីប​អឺរ៉ុប អាស៊ី និង​អាហ្វ្រិក។ ប្រទេសនេះមានព្រំដែនគោកជាប់នឹងប្រទេសអាល់បានីនៅភាគពាយព្យ ម៉ាសេដ្វានខាងជើង និងប៊ុលការីនៅភាគខាងជើង និងប្រទេសតួកគីនៅភាគឦសាន។ ចំណែកឯព្រំដែនសមុទ្រវិញ ក្រិកគឺជាប់នឹងសមុទ្រអ៊ីជាននៅភាគខាងកើត សមុទ្រអ៊ីយ៉ូនីនៅភាគខាងលិច សមុទ្រក្រេតង់ និងសមុទ្រមេឌីទែរ៉ានេនៅភាគខាងត្បូង។ ក្រិកជាប្រទេសដែលមានឆ្នេរសមុទ្រវែងជាងគេនៅលើបារាយណ៍មេឌីទែរ៉ានេ និងឆ្នេរសមុទ្រវែងជាងគេទី ១១ នៅលើពិភពលោកដោយមានប្រវែង ១៣,៦៧៦ គីឡូម៉ែត្រ និងមានកោះជាច្រើនដែលក្នុងនោះមានកោះចំនួន ២២៧ មានមនុស្សរស់នៅ។ ប៉ែតសិបភាគរយនៃទឹកដីក្រិកគឺជាតំបន់ភ្នំ ដោយភ្នំអូឡាំពូសជាកំពូលខ្ពស់បំផុតនៅក្នុងប្រទេសដែលមានកម្ពស់ ២,៩១៨ ម៉ែត្រ។