Բանգկոկ,Կրունգթհեպ (թաի.՝ กรุงเทพฯ, Կրունգ Թհեպ, կամ՝ Կրունգ Թհեպ Մահա Նաքհոն), Թայլանդի մայրաքաղաքն է և գլխավոր նավահանգիստը։ Բնակչությունը կազմում է 8,160,522 մարդ (2007 թվականի հուլիս ամսվա տվյալներով)։ Գտնվում է Մենամ Չաո Պրայա գետի գետաբերանի մերձակայքում՝ Հարավչինական ծովի Սիամի ծոցից 30 կմ հեռավորության վրա։

Բանգկոկը Թայլանդի խոշորագույն քաղաքն է։ Հիմնադրման ժամանակ քաղաքին տրված անվանումը գրանցվել է Գինեսի ռեկորդների գրքում՝ որպես որևէ քաղաքի երբևէ տրված ամենաերկար անվանում։

Հարավարևելյան Ասիայի ամենաարագ աճող քաղաքներից է։ Զբաղեցնում է ավելի քան 1,5 հազար քառակուսի կիլոմետր տարածք։ Բանգկոկցիների կարծիքով՝ իրենց քաղաքը տարածաշրջանային այն նոր ու հզոր կենտրոններից է, որ կարող է մրցակցել Սինգապուրի, Հոնկոնգի հետ։ Թայլանդի մայրաքաղաքը համարվում է նաև զբոսաշրջիկների համար ամենագրավիչ քաղաքներից մեկը աշխարհում։

Մայրաքաղաքային օկրուգը հարևան հինգ մարզերի՝ Նոնթհաբուրիի, Սամութպրականի, Պաթհումթհանիի, Սամութսաքհոնի և Նաքհոնփաթհոմի հետ կազմում է Մեծ Բանգկոկ ագլոմերացիան։