ანტიგუა-გვატემალა (ესპ. Antigua Guatemala) — ქალაქი გვატემალაში, საკატეპეკესის დეპარტამენტის ადმინისტრაციული ცენტრი. მდებარეობს ზღვის დონიდან 1533 მეტრზე, მოსახლეობა 34685 კაცი (2007 წლის აღწერით).

ქალაქი 1527 წელს დააარსა კონკისტადორმა პედრო დე ალვარადომ და უწოდა სანტიაგო-დე-ლოს-კაბალიეროსი. 1542 წელს დასახლება გაანადგურა ღვარცოფმა, რომელიც წარმოიქმნა ვულკან აგუას ამოფრქვევის შედეგად (დღეს მის ადგილზე მდებარეობს სოფელი სიუდად-ვიეხა ანუ "ძველი ქალაქი"). პროვინციის დედაქალაქი გადაიტანეს იქ, სადაც დღეს ანტიგუა-გვატემალა მდებარეობს.

1979 წელს ანტიგუა-გვატემალა გახდა ლათინური ამერიკის ერთ-ერთი პირველი ქალაქი, რომელიც იუნესკომ შეიყვანა მსოფლიო მემკვიდრეობის ძეგლების სიაში.