មូរីតានី មានជាផ្លូវការ សាធារណរដ្ឋឥស្លាមមូរីតានី (អារ៉ាប់៖ الجمهورية الإسلامية الموريتانية) គឺជាប្រទេសអធិបតេយ្យមួយនៅអាហ្វ្រិកខាងលិច ដែលមានព្រំប្រទល់ជាប់នឹងមហាសមុទ្រអាត្លង់ទិកនៅភាគខាងលិច ខាងលិចសាហារ៉ានៅភាគខាងជើង និងភាគពាយ័ព្យ ប្រទេសអាល់ហ្សេរីនៅភាគឦសាន ប្រទេសម៉ាលីនៅខាងកើតនិងអាគ្នេយ៍ និងសេណេហ្គាល់នៅភាគនិរតី។ មូរីតានី គឺជាប្រទេសធំជាងគេទី១១នៅទ្វីបអាហ្រ្វិក និងធំជាងគេទី២៨នៅលើពិភពលោក ហើយ៩០% នៃទឹកដីរបស់ខ្លួនស្ថិតនៅក្នុងវាលខ្សាច់សាហារ៉ា ភាគច្រើននៃចំនួនប្រជាជនរបស់ខ្លួនចំនួន៤.៤លាននាក់រស់នៅក្នុងតំបន់អាកាសធាតុភាគខាងត្បូងនៃប្រទេស ដែលមានប្រហែលមួយភាគបីប្រមូលផ្តុំនៅក្នុងរដ្ឋធានី និងទីក្រុងធំបំផុតគឺ ណូអាចុត ដែលមានទីតាំងនៅឆ្នេរមហាសមុទ្រអាត្លង់ទិក។

ទោះបីជាមានធនធានធម្មជាតិច្រើន រួមទាំងរ៉ែដែក និងប្រេងឥន្ធនៈក៏ដោយ ប្រទេសម៉ូរីតានីនៅតែក្រីក្រ សេដ្ឋកិច្ច​របស់​ប្រទេសផ្អែកលើវិស័យកសិកម្ម បសុសត្វ និង​នេសាទ​ជា​ចម្បង។ ម៉ូរីតានី ត្រូវបានគេមើលឃើញជាទូទៅថាមានកំណត់ត្រាសិទ្ធិមនុស្សមិនល្អ ហើយត្រូវបានចោទប្រកាន់ជាពិសេសចំពោះការបន្តធ្វើទាសភាពជាស្ថាប័នមួយនៅក្នុងសង្គមម៉ូរីតានី ជាប្រទេសចុងក្រោយបង្អស់ក្នុងពិភពលោកដែលលុបចោលការអនុវត្តនៅឆ្នាំ១៩៨១ ហើយមានតែការដាក់ទោសទណ្ឌលើកម្មសិទ្ធិរបស់ទាសករទាំងស្រុងក្នុងឆ្នាំ២០០៧។