Сан Себастијан (шпански: San Sebastián) или Доностија (баскиски: Donostia) — крајбрежен град во Северна Шпанија, кој се наоѓа во Автономната заедница Баскија и е главен град на провинцијата Гипускоа.

Главните активности на овој град се трговијата и туризмот. Сан Себастијан е една од важните туристички одредишта во Шпанија и Европа. Прекрасните пејзажи, како што се заливот Ла Конча и развојот на модерната архитектура, кој започнал во втората половина на XIX век придонеле за развој на туризмот на европско ниво. Меѓународниот филмски фестивал во Сан Себастијан, исто така, придонел градот да биде нашироко познат.