ប៉ាពួនូវែលគីនេ
Context of ប៉ាពួនូវែលគីនេ
ប្រទេសប៉ាពួនូវែលគីនេ (ភាសាតុកពីស៊ីន៖ Papua Niugini, ភាសាហ៊ីរីម៉ូទូ៖ Papua Niu Gini) ដោយមានឈ្មោះជាផ្លូវការថា រដ្ឋឯករាជ្យប៉ាពួនូវែលគីនេ គឺជាប្រទេសមួយស្ថិតនៅក្នុងទ្វីបអូសេអានី ដោយគ្របដណ្តប់លើដីប៉ែកខាងកើតនៃកោះនូវែលគីនេ និងនៅលើកោះមួយចំនួននៃតំបន់មេឡាណេស៊ី (ពោលជាតំបន់មួយនៅភាគនិរតីមហាសមុទ្រប៉ាស៊ីហ្វិក និងភាគខាងជើងប្រទេសអូស្ត្រាលី)។ វាមានរាជធានីឈ្មោះ ព័រម៉ូរែសប៊ី ដែលស្ថិតនៅឯឆ្នេរសមុទ្រភាគអាគ្នេយ៍។ វាគឺជាប្រទេសកោះធំជាងគេទីបីនៅលើពិភពលោកដែលមានផ្ទៃដីសរុប ៤៦២,៨៤០ គីឡូម៉ែត្រការ៉េ។
ភាសាផ្លូវការរបស់ប្រទេសនេះគឺ ភាសាតុកពីសុីន ហ៊ីរីម៉ូទូ ភាសាសញ្ញា និងភាសាអង់គ្លេស ហើយវាមានប្រជាជនចំនួន ៨ លាននាក់។ ប៉ាពួញូនូវែលគីនេជាប្រទេសមួយដែលមានវប្បធម៌ចម្រុះបំផុតនៅលើពិភពលោក និងសំបូរទៅដោយគ្រាមភាសាចំនួន ២៤៨ ភាសា។ ប៉ាពួនូវែលគីនេបានទទួលឯករាជ្យពីប្រទេសអូស្ត្រាលីនៅពីថ្ងៃទី១៦ ខែកញ្ញា ឆ្នាំ១៩៧៥។